கம்யூனிஸ நாடான சீனாவைப் பொறுத்தவரை அதன் பொருளாதாரத்தை தற்போது தனியாரினால் நடத்தப்படும் வணிக நிறுவனங்களே ஆக்கிரமித்துள்ளதாகவும், அந்த நாட்டுக்கு தேவையான அநேகமான தொழில்வாய்ப்புக்களை இந்த தனியார் வணிக முயற்சிகளே உருவாக்கிவருவதாகவும், சீனாவில் முதன் முதலாக நடத்தப்பட்ட பொருளாதார கணிப்பீடு ஒன்று கூறுகிறது.

பல்வேறு நாடுகளில் ஆட்சி மீது மக்களுக்கு திருப்தியில்லை - பிபிசி கருத்துகணிப்பு முடிவு

பல்வேறு நாடுகளில் மக்கள் தம்மீது நடக்கும் ஆட்சி பற்றி என்ன நினைக்கிறார்கள் என்பது பற்றி உலக அளவில் மிகப்பெரிய கருத்துகணிப்பு ஒன்றை பிபிசி நடத்தியுள்ளது. மக்களின் விருப்பத்திற்கேற்ப தமது நாடுகள் ஆட்சிசெய்யப்படுகின்றன என்பதை வெறும் 30 சதவீத மக்கள்தான் ஆமோதிக்கிறார்கள் என்பதாக இந்த சுற்றாய்வின் முடிவுகள் அமைந்துள்ளன.

 டென்மார்க்  இளவரசி மரிய பிரடறிக் மகப்பேற்றுக்காக நேற்று செவ்வாய் வைத்தியசாலையில் அனுமதிக்கப்பட்டார். குழந்தை பிறப்பதற்கு சுமார் ஆறு வாரங்கள் முன்னதாகவே இவர் வைத்தியசாலையில் அனுமதிக்கப்பட்டுள்ளார். ஆனால் இவர் நலமாக உள்ளதாக வைத்தியசாலை வட்டாரங்கள் தெரிவித்தன. மேலதிக விபரங்கள் வெளியாகவில்லை. மகப்பேறு காரணமாக இளவரசியின் ஆறு வாரகால கடமைகள் நிறுத்தி வைக்கப்பட்டுள்ளன.

உலகின் சிறந்த முதலீட்டுக்கு உரிய நாடு எது என்ற விவகாரத்தில் இலங்கைக்கு எந்த இடமும் கிடைக்கவில்லை. டென்மார்க் எட்டாவது இடம் பிடித்துள்ளது. உலகின் முதலீடு செய்ய இலகுவான நாடு என்ற பட்டியலில் முதலிடம் நியூசிலாந்து, 2. சிங்கப்பூர் 3. அமெரிக்கா 4. கனடா 6. அவுஸ்திரேலியா 7. கொங்கொங் 8. டென்மார்க் 9. இங்கிலாந்து 10. ஜப்பான் 17. சுவிஸ் 19. ஜேர்மனி 20 தாய்லாந்தும் வந்துள்ளன. வரும் 2015 ம் ஆண்டு மூன்றாம் உலக நாடுகளில் 115 மில்லியன் மக்கள் ஏதிலிகளாக வறுமையில் வாட உள்ளனர். மத்திய கிழக்கு வட்டகையில் 18 - 25 வயதுக்குட்பட்ட இளைஞர்கள் பெரும் வேலையில்லா திண்டாட்டத்தை சந்திக்க இருக்கிறார்கள். இந்த நிலையில் புத்திசாதுரியமாக செயற்பட, முதலிட வில்லங்கமில்லாத நாடுகள் என்று இவை தேர்வாகியுள்ளன.

இராக் தலைநகர் பாக்தாத்தில் நடைபெற்ற தொடர் குண்டு வெடிப்புக்களில் நூற்று ஐம்பதிற்கும் அதிகமானோர் கொல்லப்பட்டனர், குறைந்த பட்சம் இருநூறு பேர் காயமடைந்துள்ளனர்.

அமெரிக்கா தலைமையிலான படையெடுப்பு நடைபெற்றதில் இருந்து பாக்தாத்தில் நடைபெற்ற மிக மோசமான தாக்குதல்களில் இன்றைய தாக்குதல்கள் அடங்கும்.

ஐ.நா மன்றம், அதனை நிறுவியவர்களின் லட்சியஙகளுக்கு உண்மையாக இருக்கவேண்டும் என்றும் , நவீன உலகின் சவால்களை எதிர்கொள்ள அதற்கு உதவக்கூடிய அர்த்தமுள்ள சீர்திருத்தத் திட்டங்களை மேற்கொள்ளுமாறு அமெரிக்க அதிபர் புஷ் ஐ.நாவை வலியுறுத்தியுள்ளார்.

170க்கும் மேற்பட்ட உலகத்தலைவர்கள் ஐ.நாவின் எதிர்காலத்தைப்பற்றி விவாதிக்க கூடியிருக்கும் நியூயோர்க் கூட்டத்தில் பேசிய புஷ், ஐ.நா மன்றம் பலமானதாகவும், திறமையானதாகவும், ஊழலற்றதாகவும், அது பணிபுரியும் மக்களுக்கு பதிலளிக்கக்கூடியதாகவும் இருக்கவேண்டும் என்று கூறினார்.

அமெ.படைகள் வெளியேற கால எல்லை நிர்ணயிக்கப்படமாட்டாது வாஷிங்டனில் ஈராக் ஜனாதிபதி

ஈராக்கிலிருந்து அமெரிக்க துருப்புக்கள் வெளியேறுவதற்கான கால எல்லை தற்போதைக்கு நிர்ணயிக்கப்படமாட்டாது என ஈராக்கிய ஜனாதிபதி ஜலால் தலபானி , வாஷிங்டனில் தெரிவித்தார்.

அமெரிக்க ஜனாதிபதி ஜோர்ஜ் டப்ள்யூ புஷ்ஷை அவர் சந்தித்தார், இச்சந்திப்பை அடுத்து , இவ்விருவரும், கூட்டுப் பத்திரிகையாளர் மாநாடொன்றை நடத்தினர்.

மத்தியக்கிழக்கில் காஸா பகுதியிலிருந்து இஸ்ரேல் படையினர் விலகியதை அடுத்து இரண்டு நாட்களாக இருந்துவரும் குழப்ப நிலையை அடுத்து, காஸா பகுதி - எகிப்து இடையிலான எல்லை இன்று நள்ளிரவு மூடப்பட இருக்கிறது. அதற்குள் மக்கள் தத்தம் இடங்களுக்குத் திரும்பிவிட வேண்டும் என்று தெற்கு காஸா பகுதி பாலஸ்தீனத் தளபதி ஜமால் கையித் எச்சரித்திருக்கிறார்.