|
வடக்கு பாகிஸ்தான் மற்றும் இந்தியா உள்ளிட்ட ஒரு பரவலான நிலப்பகுதியில் கடும் பூகம்பம் தாக்கியுள்ளது. ரிக்டர் மானியில் 7.6 புள்ளிகள் அளவிருந்த இந்த நிலநடுக்கத்தால் குறைந்தபட்சம் ஆயிரத்து இருநூறு பேர் கொல்லப்பட்டுள்ளதாக செய்திகள் தெரிவிக்கின்றன.
பாகிஸ்தான் ஒரு இயற்கை பேரழிவு சம்பவத்தை எதிர்கொண்டுள்ளது என பிபிசியிடம் பேசிய பாகிஸ்தான் உள்துறை அமைச்சர் ஷௌகத் சுல்தான் தெரிவித்தார். பாகிஸ்தான் நிர்வாகத்திற்குட்பட்ட காஷ்மீரில் இந்த பூகம்பத்தின் மையம் அமைந்திருந்தது. அப்பகுதியின் முக்கிய நகரமான முஸாஃபராபாத்தில் பல கட்டிடங்கள் இடிந்து தரைமட்டமாகின. பாகிஸ்தான் வடபகுதியில் கிராமங்கள் முற்றும்முழுதாக அழிக்கப்பட்டுள்ளதாகவும் பல சாலைகள் போக்குவரத்துக்கு பயனற்றதாகியிருப்பதாகவும், தொலைபேசி இணைப்புகள் செயலிழந்து காணப்படுவதாகவும் செய்திகள் தெரிவிக்கின்றன. தேசத்தின் உறுதியை சோதித்துப் பார்க்கும் விஷயம் இந்த பூகம்பம் என்று பாகிஸ்தான் அதிபர் முஷரப் தெரிவித்துள்ளார். இந்திய கட்டுப்பாட்டு காஷ்மீரில் 220 பேர் பலி இந்தியக் கட்டுப்பாட்டில் உள்ள காஷ்மீர் பகுதியில் குறைந்தது 220 பேர் பலியாகியுள்ளதாக இந்திய அதிகாரிகள் கூறியுள்ளனர். சர்ச்சைக்குரிய இந்தப் பிராந்தியத்தை பிரிக்கும் கட்டுப்பாட்டுக்கோட்டுக்கு அருகில் உள்ள பகுதிகளிலேயே அதிகமானோர் பலியாகியுள்ளனர். அத்துடன் பல சிறிய நகரங்கள் நிர்மூலமாகியுள்ளன. இடிந்து வீழ்ந்த கட்டிடங்களில் இருந்து வெளியே தப்பியோடிய போது நூற்றுக்கணக்கானோர் காயமடைந்துள்ளனர். மண்சரிவுகளும் நடந்துள்ளதாக செய்திகள் கூறுகின்றன. இந்தப் பிராந்தியத்தில் நிறுத்தப்பட்டிருந்த இந்திய இராணுவத்தினரும் இந்த மண் சரிவுகளால் கொல்லப்பட்டுள்ளனர். இரவு வேளையில் மிகவும் உறைந்து போகக்கூடிய அளவுக்கு வெப்பநிலை குறையக் கூடிய சாத்தியம் இருப்பதால், பூகம்பத்தால் வீடுகளை இழந்த காஷ்மீரிகளுக்கு இந்திய அரசினால் கூடாரங்கள் விமானமூலம் அனுப்பிவைக்கப்பட்டுள்ளன. பூகம்ப உதவிகள் வரத்தொடங்கின பூகம்பத்தால் பாதிக்கப்பட்ட பாகிஸ்தானுக்கு அவசர உதவிகளையும் நிதியையும் வழங்க முன்வந்துள்ள ஐரோப்பிய ஒன்றியம், தேவைப்படும் பட்சத்தில் உடனடியாக பணத்தை வழங்கக் கூடியதாக இருப்பதாகவும் கூறியுள்ளது. பூகம்பத்தால் பாதிக்கப்பட்ட பகுதிகளில் களத்தில் சேவையில் இருக்கும் சர்வதேச செஞ்சிலுவைச் சங்கம் மற்றும் எம்.எஸ்.எப் ஆகிய இரண்டு நிறுவனங்களுடனும் ஐரோப்பிய ஒன்றியம் தொடர்பில் இருப்பதாக ஒன்றியத்தின் சார்பில் பேசவல்ல ஒருவர் கூறினார். இடிபாடுகளில் சிக்கியுள்ள மக்களை மீட்பதற்கான நிபுணர்களின் உதவியுடன் நிதியுதவியும் தேவை என்று பாகிஸ்தானின் பிரதமர் சௌகத் அஸீஸ் கூறியுள்ளார். மருத்துவ மற்றும் மீட்புப் பணியில் நிபுணத்துவம் பெற்ற 60 பேர் கொண்ட குழு ஒன்றை பிரிட்டன் அனுப்புகிறது. ஜேர்மனி, துருக்கி மற்றும் கிறீஸ் ஆகிய நாடுகளும் உடனடி உதவிகளை வழங்க முன்வந்துள்ளன. மருத்துவ மற்றும் மீட்ட்புப் பணி அதிகாரிகள் அடங்கிய குழுக்களை பாகிஸ்தான் வடக்கு நோக்கி ஹெலிக்கொப்டரில் அனுப்பியுள்ளது. உள்ளூர் மருத்துவ மனைகள் அவசர சேவைக்கான ஆயத்த நிலையில் வைக்கப்பட்டுள்ளதுடன், கிராமப் புறங்களில் மருத்துவ முகாம்களும் ஏற்படுத்தப்பட்டுள்ளன.
bbc
|
