|
சிறிலங்காப் படையினரின் முன்நகர்வுகளுக்கு எதிராக எதிர்த்தாக்குதல்களை நடத்திவந்த தமிழீழ விடுதலைப் புலிகள், தற்போது வலிந்த தாக்குதல்களை ஆரம்பித்துள்ளனர். இது படையினருக்கு கணிசமான இழப்புக்களை ஏற்படுத்தி வருகின்றது என்று சிறிலங்காவின் தலைநகர் கொழும்பிலிருந்து வெளிவரும் 'லக்பிம' ஆங்கில வார ஏடு தெரிவித்துள்ளது.
இது தொடர்பில் அந்த ஏட்டின் பாதுகாப்பு ஆய்வுப்பத்தியில் தெரிவிக்கப்பட்டுள்ளவற்றின் முக்கிய பகுதிகள்:
படையினரின் பல முன்நகர்வுகளுக்கு எதிர்ப்பை மட்டும் காட்டிவந்த விடுதலைப் புலிகள் கடந்த முதலாம் நாளில் இருந்து கடுமையான எதிர்த்தாக்குதல்களையும் மேற்கொள்ள ஆரம்பித்துள்ளனர். இது படையினருக்கு பெரும் இழப்புக்களை ஏற்படுத்தி வருகின்றது.
மல்லாவிக்கு தென்புறமாக தமது நிலைகளை பலப்படுத்தி வந்த படையினரின் 57 ஆவது வலிந்த தாக்குதல் படையணி மீது விடுதலைப் புலிகளின் இம்ரான்-பாண்டியன் மற்றும் சாள்ஸ் அன்ரனி சிறப்பு படையணிகள் கடுமையான தாக்குதலை நடத்தின.
பதுங்குகுழிகளை அமைத்துக்கொண்டிருந்த படையினர் மீது விடுதலைப் புலிகளின் சிறப்பு அணிகள் திடீர் தாக்குதலை தொடுத்திருந்தன.
மல்லாவி மற்றும் துணுக்காய் பகுதிகளில் விடுதலைப் புலிகள் தமது நிலைகளை பலப்படுத்தி வருவதாக இரு வாரங்களுக்கு முன்னர் படையினரின் புலனாய்வுத்துறை தெரிவித்திருந்த நிலையில் இத்தாக்குதல்கள் இடம்பெற்றன.
இம்மோதல்களின் போது காயமடைந்த படையினரை மீட்டுவரச் சென்ற படையினரின் வாகனத்தின் மீதும் விடுதலைப் புலிகள் பதுங்கி தாக்குதலை நடத்தினர்.
வாகனத்தின் மீது விடுதலைப் புலிகள் நடத்திய ஆர்பிஜி தாக்குதலில் அதன் சாரதியும், அதில் பயணித்த இரு படையினரும் கொல்லப்பட்டனர்.
மோதல்களில் 20 படையினர் கொல்லப்பட்டதுடன், 5 பேர் காணாமல் போயுள்ளதாகவும், 50-க்கும் அதிகமான படையயினர் காயமடைந்துள்ளதாகவும் படைத்தரப்பு தெரிவித்திருந்தது.
இதனிடையே கடந்த செவ்வாய்கிழமை கல்விளான் பகுதியிலும் நிலைகொண்டிருந்த படையினர் மீது விடுதலைப் புலிகள் வலிந்த தாக்குதலை நடத்தினர்.
இதில், 7 படையினர் கொல்லப்பட்டதுடன், ஒருவர் காணாமல் போயிருந்தார். கல்விளான் துணுக்காய் பகுதிக்கு 2 கி.மீ தென்புறமாக உள்ளது குறிப்பிடத்தக்கது.
படைத்தரப்பு அதிக இழப்புக்களைச் சந்தித்ததனைத் தொடர்ந்து படையினர் தற்போது இரு பல்குழல் உந்துகணை செலுத்திகளை அப்பகுதிக்கு நகர்த்தியுள்ளதுடன், கடுமையான தாக்குதல்களையும் மேற்கொண்டுள்ளது.
விடுதலைப் புலிகளின் வலிந்த தாக்குதல்களை தடுப்பதற்காக படையினர் தற்போது பல்குழல் உந்துகணை செலுத்திகளை பெருமளவில் பயன்படுத்தி வருகின்றது.
மன்னாரின் வடக்குப்புறமாக வெள்ளாங்குளம் நோக்கி நகர்ந்துள்ள படையினரின் 58 ஆவது படையணியினர் 25 கி.மீ தொலைவில் உள்ள பூநகரியை கைப்பற்றும் நோக்கத்துடன் நகர்வுகளை மேற்கொண்டு வருகின்றனர்.
விடுதலைப் புலிகளின் பீரங்கி நிலைகளை கைப்பற்றும் முகமாகவே படையினர் பூநகரி நோக்கிய நகர்வை மேற்கொள்ள திட்மிட்டுள்ளது.
மேலும் வன்னியின் முன்னணி களமுனைகளில் இருந்து மகளிர் படையணிகளை விலக்கிக்கொண்ட விடுதலைப் புலிகள், அங்கு தமது சிறப்பு படையணிகளான சாள்ஸ் அன்ரனி மற்றும் இம்ரான்-பாண்டியன் படையணிகளை நகர்த்தியுள்ளனர்.
மல்லாவி மற்றும் துணுக்காய் பகுதிகளில் 700-க்கும் அதிகமான சிறப்பு படையினரை விடுதலைப் புலிகள் நகர்த்தியுள்ளனர் என்று அதில் தெரிவிக்கப்பட்டுள்ளது.
நெருடல் இணையம்
|
