|
கருணா - பிள்ளையான் முரண்பாடுகள் ஆயுத மோதலை நோக்கிச் செல்வதை தடுக்க இரகசிய கூட்டம் |
|
|
|
Saturday, 27 September 2008 |
|
கருணா மற்றும் பிள்ளையான் இடையில் ஏற்பட்டுள்ள முரண்பாடுகள் ஆயுத மோதல் ஒன்றை நோக்கி செல்வதை தடுக்கும் வகையில் நாளையும் (28) நாளை மறுதினமும் (29) இரண்டு தரப்பினருக்கும் இடையில் விசேட பேச்சுவார்த்தைகள் நடத்தப்படவுள்ளன.
இரண்டு தரப்புக்கும் இடையில் நல்லெண்ணத்தைக் கட்டியெழுப்பும் வகையில் கொழும்பில் ரகசிய இடமொன்றில் நடத்தப்படவுள்ள இந்தப் பேச்சுவார்த்தையில் உயர்மட்டத் தரப்பும் தலையீடுகளை மேற்கொண்டுள்ளதாக நம்பத் தகுந்த தரப்புத் தகவல்கள் தெரிவிக்கின்றன.
இருதரப்புக்கும் இடையில் ஏற்பட்டுள்ள பிரச்சினை மோதலாக உருவெடுத்து கடந்த 25 ஆம் திகதி மட்டக்களப்பு நல்லையா வீதியில் உள்ள கருணா தரப்பினர் அடிக்கடி கூடும் ரி.எம்.வீ.பி. அலுவலகம் ஒன்றின் மீது கைக்குண்டு தாக்குதல் நடத்தப்பட்டது. இந்தக் கைக்குண்டுத் தாக்குதலை பிள்ளையான் குழுவினர் மேற்கொண்டனர் என கருணா தரப்பினர் காவற்துறையினரிடம் தெரிவித்துள்ளனர்.
கிழக்கு மாகாண முதலமைச்சர் சிவநேசத்துரை சந்திரகாந்தனின் அதிகாரி ஒருவர் விடுதலைப்புலிகளுடன் இணைந்து செயற்பட்டு வருவதே இந்த மோதல்கள் ஏற்படக் காரணம் என கருணா தரப்பினர் தெரிவித்துள்ளனர்.எனினும் இந்தக் குற்றச்சாட்டுகள் உண்மைக்கு புறம்பானது எனவும் இரண்டு தரப்புக்கும் இடையில் அவ்வாறான மோதல்கள் இடம்பெறவில்லை எனவும் கிழக்கு மாகாண முதலமைச்சரின் இணைப்புச் செயலாளரான அசாத் மௌலானா கூறியுள்ளார்.
நெருடல் இணையம்
|
